Malayalam 
ജപ്പാനില് വന് ഭൂചലനം; പിന്നാലെ സുനാമി മുന്നറിയിപ്പ്
ടോക്യോ: ജപ്പാനില് വന്ഭൂചലനമുണ്ടായതിന് പിന്നാലെ സുനാമി മുന്നറിയിപ്പുമായി അധികൃതര്. ജപ്പാനില് റിക്ടര്സ്കെയിലില് 7.6 തീവ്ര രേഖപ്പെടുത്തിയ ഭൂചലനമാണ് ഉണ്ടായതെങ്കിലും ആണവനിലയങ്ങള്ക്ക് ഭീഷണിയില്ലെന്ന് അധികൃതര് അറിയിച്ചു. അതേസമയം ഭൂചലനമുണ്ടായ സാഹചര്യത്തില് സുനാമിയുണ്ടാകാനുള്ള സാധ്യതയുണ്ടെന്നും തീരദേശ മേഖലയിലുള്ളവര് ഒഴിഞ്ഞുപോകണമെന്നും അധികൃതര് മുന്നറിയിപ്പ് നല്കിയിട്ടുണ്ട്.
ഇന്ത്യന് സമയം ഇന്ന് ഉച്ചയോടെ ഇഷികാവയിലെ നോട്ടോ മേഖലയിലാണ് ആദ്യം ഭൂചലനമുണ്ടായത്. തുടര്ന്ന് വിവിധയിടങ്ങളില് തുടര്ചലനങ്ങള് അനുഭവപ്പെട്ടു. നൈഗാട്ട, ടൊയാമ, ഇഷികാമ തുടങ്ങിയ മേഖലകളിലാണ് സുനാമി മുന്നറിയിപ്പ് നല്കിയിരിക്കുന്നത്.
Also Read; യുഡിഎഫില് ഐക്യം അനിവാര്യമെന്ന് രമേശ് ചെന്നിത്തല
ഭൂചലനമുണ്ടായി പത്തുമിനുട്ടിനുശേഷം തീരദേശ മേഖലയില് സുനാമി തിരമാലകളടിച്ചതായുള്ള റിപ്പോര്ട്ടുകളും ഇതിനിടെ പുറത്തുവന്നിട്ടുണ്ട്. 1.2 മീറ്റര് ഉയരത്തിലായുള്ള സുനാമി തീരയാണ് ജപ്പാനിലെ വജിമ നഗരത്തിലെ തീരപ്രദേശത്തടിച്ചതെന്നാണ് റിപ്പോര്ട്ട്. അഞ്ചു മീറ്റര് വരെ ഉയരത്തിലുള്ള സുനാമി തീരകള് അടിക്കാനുള്ള സാധ്യതയുണ്ടെന്നും അതിനാല് തീരപ്രദേശത്തുള്ളവര് മാറി താമസിക്കണമെന്നും അധികൃതര് മുന്നറിയിപ്പ് നല്കി.
