സീതാറാം യെച്ചൂരിക്ക് രാജ്യം ഇന്ന് അവസാന യാത്രയയപ്പ് നല്കും ; 11 മണിക്ക് എകെജി സെന്ററില് പൊതുദര്ശനം, 5 മണിക്ക് മൃതദേഹം എയിംസിന് കൈമാറും
ഡല്ഹി : സീതാറാം യെച്ചൂരിക്ക് രാജ്യം ഇന്ന് അവസാന യാത്രയയപ്പ് നല്കും. വെള്ളിയാഴ്ച യെച്ചൂരിയുടെ വസതിയിലെത്തിച്ച ഭൗതിക ശരീരം ഇന്ന് രാവിലെ പതിനൊന്ന് മണിക്ക് സിപിഎം ദേശീയ ആസ്ഥാനമായ എകെജി ഭവനിലേക്ക് കൊണ്ടുപോകും. തുടര്ന്ന് അവിടെ പൊതുദര്ശനം ഉണ്ടായിരിക്കും. ശേഷം എകെജി സെന്ററില് നിന്നും ഉച്ചയോടെ മൃതദേഹം വിലാപയാത്രയായി കൊണ്ടുപോകും. ഇന്ന് വൈകീട്ട് അഞ്ച് മണിയോടെ മൃതദേഹം മെഡിക്കല് പഠനത്തിനായി ഡല്ഹി എയിംസിന് കൈമാറും.
Also Read ; ഓണത്തിരക്ക് ; കാലുകുത്താനിടമില്ലാതെ തീവണ്ടികള്, അധിക കോച്ചുകള് ഘടിപ്പിച്ച് റെയില്വേ
ശ്വാസകോശ അണുബാധയെ തുടര്ന്ന് എയിംസില് ചികിത്സയിലിരിക്കെയായിരുന്നു സീതാറാം യെച്ചൂരിയുടെ മരണം. ആന്ധ്രാപ്രദേശിലെ കിഴക്കന് ഗോദാവരി സ്വദേശിയായ സീതാറം യെച്ചൂരി 1952 ഓഗസ്റ്റ് 12-ന് മദ്രാസിലാണ് ജനിച്ചത്. സര്വേശ്വര സോമയാജി യെച്ചൂരിയുടെയും ഭാര്യ കല്പികയുടെയും മകനായിരുന്നു. ഡല്ഹി സെന്റ് സ്റ്റീഫന്സ് കോളേജില് നിന്ന് സാമ്പത്തിക ശാസ്ത്രത്തില് ബിരുദം നേടിയ ഇദ്ദേഹം ജെ.എന്.യുവില് നിന്ന് സാമ്പത്തിക ശാസ്ത്രത്തില് ബിരുദാനന്തര ബിരുദം നേടി. ജെ.എന്.യുവില് വച്ച് കമ്മ്യൂണിസ്റ്റ് പാര്ട്ടിയില് ആകൃഷ്ടനായി. 1974-ല് എസ്എഫ്ഐയില് അംഗമായി. മൂന്നുവട്ടം ജെ.എന്.യു സര്വകലാശാല യൂണിയന് പ്രസിഡന്റായി. ജെഎന്യുവില് പിഎച്ച്ഡിക്ക് ചേര്ന്നെങ്കിലും അടിയന്തരാവസ്ഥക്കാലത്തെ ഒളിവുജീവിതം മൂലം പൂര്ത്തിയാക്കാനായില്ല.
1978-ല് എസ്എഫ്ഐയുടെ ദേശീയ ജോയിന്റ് സെക്രട്ടറിയായി തെരഞ്ഞെടുക്കപ്പെട്ടു. 1986-ല് എസ്എഫ്ഐ ദേശീയ പ്രസിഡന്റായി. 1984-ല് 32ാം വയസ്സിലാണ് സിപിഎം കേന്ദ്രക്കമ്മിറ്റി അംഗമായത്. 1988-ല് തിരുവനന്തപുരത്ത് നടന്ന പാര്ട്ടി കോണ്ഗ്രസില് കേന്ദ്ര സെക്രട്ടേറിയേറ്റ് അംഗമായി. 1992-ല് മദ്രാസില് നടന്ന പാര്ട്ടി കോണ്ഗ്രസില് പൊളിറ്റ് ബ്യൂറോ അംഗമായി.
Join with metropost : വാർത്തകൾ വേഗത്തിലറിയാൻ മെട്രോപോസ്റ്റ് വാട്സ്ആപ്പ് ഗ്രൂപ്പില് അംഗമാകൂ..