Malayalam 
ചിന്നസ്വാമി സ്റ്റേഡിയത്തിലുണ്ടായ ദുരന്തം; നാലുപേര് അറസ്റ്റില്
ബംഗളൂരു: ഐപിഎല് കിരീടം സ്വന്തമാക്കിയ റോയല് ചലഞ്ചേഴ്സ് ബംഗളൂരുവിന്റെ വിജയാഘോഷത്തിനിടെ ഉണ്ടായ തിക്കിലും തിരക്കിലുംപെട്ട് 11പേര് മരിച്ച സംഭവത്തില് നാലുപേര് അറസ്റ്റില്. ആര്സിബി മാര്ക്കറ്റിംഗ് ഉദ്യോഗസ്ഥന് നിഖില് സൊസലെയും ഇവന്റ് മാനേജ്മെന്റ് കമ്പനിയായ ഡിഎന്എ എന്റര്ടെയ്ന്മെന്റ് പ്രൈവറ്റ് ലിമിറ്റഡിലെ അംഗങ്ങളായ സുനില് മാത്യു, കിരണ്, സുമന്ത് എന്നിവരുമാണ് അറസ്റ്റിലായത്.
Also Read; മുതിര്ന്ന കോണ്ഗ്രസ് നേതാവ് തെന്നല ബാലകൃഷ്ണപിള്ള അന്തരിച്ചു
ഇന്ന് രാവിലെ 6.30ഓടെ മുംബയിലേക്ക് പോകാനായി ബംഗളൂരുവിലെ കെമ്പഗൗഡ അന്താരാഷ്ട്ര വിമാനത്താവളത്തില് എത്തിയപ്പോഴാണ് നിഖില് അറസ്റ്റിലായത്. ആര്സിബിയുടെ പ്രമോഷനുമായി ബന്ധപ്പെട്ട എല്ലാ കാര്യങ്ങളും സോഷ്യല് മീഡിയ അക്കൗണ്ടുകളും കൈകാര്യം ചെയ്തിരുന്നത് നിഖിലാണ്. കൊലപാതകത്തിന് തുല്യമായ നരഹത്യ ഉള്പ്പെടെ ഭാരതീയ ന്യായ സംഹിതയിലെ വിവിധ വകുപ്പുകള് ചുമത്തിയാണ് ഇവര്ക്കെതിരെ കേസെടുത്തിരിക്കുന്നത്.
Join with metro post: വാര്ത്തകള് വേഗത്തിലറിയാന് മെട്രോപോസ്റ്റ് വാട്സ്ആപ്പ് ഗ്രൂപ്പില് അംഗമാകൂ…
ആര്സിബി ടീമിന്റെയും ഡിഎന്എ എന്റര്ടൈന്മെന്റ് പ്രൈവറ്റ് ലിമിറ്റഡിന്റെയും കര്ണാടക സ്റ്റേറ്റ് ക്രിക്കറ്റ് അസോസിയേഷന്റെയും (കെഎസ്സിഎ) പ്രതിനിധികളെ അറസ്റ്റ് ചെയ്യാന് മുഖ്യമന്ത്രി സിദ്ധരാമയ്യ കഴിഞ്ഞ ദിവസം ഉത്തരവിട്ടിരുന്നു. ഡെപ്യൂട്ടി പോലീസ് കമ്മീഷണര് അക്ഷയ്യുടെ നേതൃത്വത്തില് സെന്ട്രല് ക്രൈം ബ്രാഞ്ച് നടത്തിയ അന്വേഷണത്തിലാണ് ഇപ്പോള് നാലുപേര് പിടിയിലായിരിക്കുന്നത്. ഇവരെ ഇന്നുതന്നെ ക്രൈം ഇന്വെസ്റ്റിഗേഷന് ഡിപ്പാര്ട്ട്മെന്റിന് കൈമാറാനാണ് സാദ്ധ്യത. കര്ണാടക സ്റ്റേറ്റ് ക്രിക്കറ്റ് അസോസിയേഷന്റെ സെക്രട്ടറി ശങ്കര്, ട്രഷറര് ജയറാം എന്നിവര് ഒളിവിലാണ്. അവരെ കണ്ടെത്താനുള്ള അന്വേഷണം പുരോഗമിക്കുകയാണ്.
