Malayalam 
അഭിമുഖ സമയത്ത് മുഖ്യമന്ത്രിക്കൊപ്പമുണ്ടായിരുന്നത് രണ്ട്പേര്; സ്വര്ണക്കടത്ത് വിവരങ്ങള് കൈമാറിയത് ഒപ്പമുണ്ടായിരുന്നവര്
ഡല്ഹി: ഡല്ഹിയിലെ കേരള ഹൗസില് മുഖ്യമന്ത്രിയുടെ അഭിമുഖം ദ ഹിന്ദു ദിനപത്രമെടുത്തപ്പോള് അവിടെ പിആര് കമ്പനിയായ കൈസന് ഗ്രൂപ്പിന്റെ സിഇഒയും ഉണ്ടായിരുന്നതായി വിവരം. മലപ്പുറത്തെ സ്വര്ണ്ണക്കടത്ത് വിവരം അഭിമുഖത്തില് ചേര്ക്കാനാവശ്യപ്പെട്ടത് കൈസന് ഗ്രൂപ്പുമായി സഹകരിക്കുന്ന റിലയന്സ് ജീവനക്കാരനും, മുന് സിപിഎം എംഎല്എ ടി കെ ദേവകുമാറിന്റെ മകന് സുബ്രഹ്മണ്യനുമാണെന്ന് വ്യക്തമായി. മറ്റ് രണ്ട് പ്രധാന പത്രങ്ങളെയും അഭിമുഖത്തിനായി പിആര് ഏജന്സി സമീപിച്ചിരുന്നു.
Also Read ; ‘തനിക്ക് ആരോടും പ്രതിബദ്ധതയില്ല, തെരഞ്ഞെടുപ്പ് രാഷ്ട്രീയ ജീവിതം അവസാനിപ്പിക്കുന്നു’: കെ ടി ജലീല് എംഎല്എ
അഭിമുഖത്തില് മുഴുവന് സമയവും പങ്കെടുത്ത കൈസന് ഗ്രൂപ്പിന്റെ സിഇഒ വിനീത് ഹാന്ഡെക്കൊപ്പം പൊളിറ്റിക്കല് വിംഗില് ഇത്തരം കാര്യങ്ങള്ക്ക് ചുക്കാന് പിടിക്കുന്ന ടി ഡി സുബ്രഹ്മണ്യനും ഉണ്ടായിരുന്നു. സുബ്രഹ്മണ്യനാണ് അഭിമുഖത്തില് ചേര്ക്കേണ്ട കൂടുതല് വിവരങ്ങള്, അതായത് മലപ്പുറത്തെ സ്വര്ണ്ണക്കടത്തിന്റേതടക്കം വിശദാംശങ്ങള് ലേഖികക്ക് കൈമാറിയത്. അഭിമുഖത്തില് പറയാന് വിട്ടുപോയതാണെന്നും ഈ വിവരങ്ങള് കൂടി വരേണ്ടതുണ്ടെന്നും സുബ്രഹ്മണ്യന് പറഞ്ഞതായാണ് വിവരം. റിലയന്സ് കമ്പനിയില് ജോലി നോക്കുന്ന സുബ്രഹ്മണ്യന് കൈസന്റെ ഇത്തരം പ്രോജക്ടുളുമായി സഹകരിക്കാറുണ്ടെന്നാണ് വിശദീകരണം.
കൈസന്റെ 75 ശതമാനം ഓഹരികളുമുള്ള കമ്പനിക്ക് റിലയന്സുമായി ബന്ധമുണ്ട്. സുബ്രമണ്യന്റെ ഇടപെടലിന് ഇതും കാരണമാണ്. ദ ഹിന്ദുവിന് പുറമെ മറ്റ് രണ്ട് പത്രങ്ങളെയും ഇതേ ഏജന്സി അഭിമുഖത്തിന് സമീപിച്ചിരുന്നു. അതേസമയം അഭിമുഖം വിവാദമായതോടെ ഓണ്ലൈനില് ഇത് തിരുത്തണം എന്നാണ് ഏജന്സി മുഖേന മുഖ്യമന്ത്രിയുടെ ഓഫീസില് നിന്ന് ആദ്യം അറിയിച്ചത്. എന്നാല് ഇതിന് തയ്യാറാകാതെ വന്നതോടെയാണ് പ്രസ് സെക്രട്ടറി കുറിപ്പ് നല്കിയത്. കഴിഞ്ഞ ലോക്സഭ തെരെഞ്ഞെടുപ്പ് കാലത്തും പിണറായിക്കായി ഏജന്സികള് മാധ്യമങ്ങളെ സമീപിച്ചിരുന്നു. ഈ വിഷയത്തില് കൂടുതല് പ്രതികരണങ്ങള്ക്കില്ലെന്നാണ് കൈസന് ഗ്രൂപ്പിന്റെ പ്രതികരണം. കരാറിലടക്കമുള്ള വിശദാംശങ്ങള് വെളിപ്പെടുത്താന് തയ്യാറാകാത്ത കൈസന് സര്ക്കാര് വിശദീകരിക്കട്ടയെന്നാണ് നിലപാടെടുക്കുന്നത്.
Join with metropost : വാർത്തകൾ വേഗത്തിലറിയാൻ മെട്രോപോസ്റ്റ് വാട്സ്ആപ്പ് ഗ്രൂപ്പില് അംഗമാകൂ..
