കൊച്ചി: പാതിവില തട്ടിപ്പ് കേസില്‍ രാഷ്ട്രീയ നേതാക്കള്‍ക്ക് പണം നല്‍കിയെന്ന് മൊഴി നല്‍കി പോലീസ് കസ്റ്റഡിയിലുള്ള പ്രതി അനന്തു കൃഷ്ണന്‍. എറണാകുളം ജില്ലയിലെ ഒരു എംഎല്‍എക്ക് ഏഴ് ലക്ഷം രൂപ, ഇടുക്കി എം പി ഡീന്‍ കുര്യാക്കോസിന് 45 ലക്ഷം രൂപ, സിപിഐഎം ഇടുക്കി ജില്ലാ സെക്രട്ടറി സി വി വര്‍ഗീസിന് 25 ലക്ഷം രൂപ, കോട്ടയം എം പി ഫ്രാന്‍സിസ് ജോര്‍ജിന് 10 ലക്ഷം രൂപ എന്നിങ്ങനെ കൈമാറിയെന്നാണ് അനന്തു കൃഷ്ണന്‍ പൊലീസിന് മൊഴി നല്‍കിയിരിക്കുന്നത്. മൂവാറ്റുപുഴയിലെ യുവ കോണ്‍ഗ്രസ് നേതാവിന് 5 ലക്ഷം രൂപ കൈവായ്പയായി നല്‍കിയെന്നും മൊഴിയുണ്ട്. ഇന്നലെ നടന്ന തെളിവെടുപ്പിന് ശേഷമായിരുന്നു അനന്തു കൃഷ്ണന്‍ പോലീസിന് നിര്‍ണ്ണായക മൊഴി നല്‍കിയത്.

Also Read; വാർത്തകൾ വേഗത്തിലറിയാൻ മെട്രോപോസ്റ്റ് വാട്സ്ആപ്പ് ഗ്രൂപ്പില്‍ അംഗമാകൂ..

മാത്യു കുഴല്‍നാടന്‍ എംഎല്‍എയ്ക്ക് പണം ബാങ്കിലേയ്ക്ക് നല്‍കാമെന്ന് പറഞ്ഞെങ്കിലും പണമായി കൈമാറിയാല്‍ മതിയെന്ന് മാത്യു കുഴല്‍നാടന്‍ ആവശ്യപ്പെട്ടെന്നും അനന്തു കൃഷ്ണന്‍ മൊഴി നല്‍കിയിട്ടുണ്ട്. ഇടുക്കി എംഎല്‍എ ഡീന്‍ കുര്യാക്കോസിന് കൈമാറിയ 45 ലക്ഷം രൂപയില്‍ 15 ലക്ഷം തെരഞ്ഞെടുപ്പ് ഫണ്ടിലേയ്ക്കും ബാക്കി 30 ലക്ഷം രൂപ വ്യക്തിപരമായും കൈമാറിയെന്നാണ് മൊഴി. സിപിഐഎം ഇടുക്കി ജില്ലാ സെക്രട്ടറി സി വി വര്‍ഗീസിന് 25 ലക്ഷം രൂപ കൈമാറിയെന്നും മൊഴിയില്‍ പറയുന്നു. തങ്കമണി സര്‍വീസ് സഹകരണ ബാങ്കിലേയ്ക്ക് പണം അയച്ചുവെന്നാണ് മൊഴി. അവിടേയ്ക്ക് അയച്ചാല്‍ മറ്റാരുടെയെങ്കിലും പേരില്‍ മാറ്റിയെടുക്കാമെന്ന് സി വി വര്‍ഗീസ് പറഞ്ഞുവെന്നും മൊഴിയിലുണ്ട്.

Join with metro post: വാർത്തകൾ വേഗത്തിലറിയാൻ മെട്രോപോസ്റ്റ് വാട്സ്ആപ്പ് ഗ്രൂപ്പില്‍ അംഗമാകൂ..

എന്നാല്‍ അനന്തു കൃഷ്ണനില്‍ നിന്നും പണം കൈപ്പറ്റിയെന്ന ആരോപണം സിപിഐഎം ഇടുക്കി ജില്ലാ സെക്രട്ടറി സി വി വര്‍ഗീസും കോണ്‍ഗ്രസ് നേതാവ് മാത്യു കുഴല്‍നാടനും നിഷേധിച്ചു. അനന്തു കൃഷ്ണനുമായി സാമ്പത്തിക ഇടപാടുകള്‍ നടത്തിയിട്ടില്ലെന്നായിരുന്നു നേതാക്കളുടെ പ്രതികരണം.