Malayalam 
സ്വര്ണപ്പാളി വിവാദം; ചെന്നൈയില് എത്തിച്ചത് ശുദ്ധമായ ചെമ്പുപാളികള്, വെളിപ്പെടുത്തി കമ്പനി അഭിഭാഷകന്, ചെന്നൈയിലെ പൂജയില് ജയറാമും പങ്കെടുത്തു
പത്തനംതിട്ട: ശബരിമല സ്വര്ണപ്പാളി വിവാദത്തില് നിര്ണായക വെളിപ്പെടുത്തലുമായി ചെന്നൈ സ്മാര്ട്ട് ക്രിയേഷന്സ് കമ്പനിയിലെ അഭിഭാഷകന്. 2019 ല് ചെന്നൈയിലെ സ്മാര്ട്ട് ക്രിയേഷന്സില് അറ്റകുറ്റപ്പണിക്ക് എത്തിച്ചത് ശുദ്ധമായ ചെമ്പുപാളികളായിരുന്നെന്ന് സ്ഥാപനത്തിന്റെ അഭിഭാഷകന് കെ ബി പ്രദീപ് വെളിപ്പെടുത്തി. കമ്പനിയിലെത്തിച്ചത് മുമ്പൊരിക്കലും സ്വര്ണം പൂശിയിട്ടില്ലാത്ത ചെമ്പുപാളികളാണ്. സ്ഥാപനത്തിന്റെ പ്രോട്ടോക്കോള് അനുസരിച്ച്, ഒരിക്കല് സ്വര്ണം പൂശിയ ലോഹം അറ്റകുറ്റപ്പണിക്കായി സ്ഥാപനം സ്വീകരിക്കാറില്ലെന്നും അദ്ദേഹം പറഞ്ഞു.
സത്യം തെളിയും, സ്വര്ണപ്പാളി തട്ടിപ്പില് വേണ്ടത് സമഗ്ര അന്വേഷണം: പി എസ് പ്രശാന്ത്
ദ്വാരപാലകരെ കവര് ചെയ്ത ക്ലാഡിങ് ആണ് എത്തിച്ചത്. ശബരിമലയില് നിന്നും അഴിച്ചു മാറ്റിയതു തന്നെയാണോ എന്ന് അറിയില്ല. ഒത്തിരി കോംപ്ലിക്കേഷന്സ് ഉള്ളതുകൊണ്ടാണ് ഒരിക്കല് സ്വര്ണം പൂശിയത് വീണ്ടും കമ്പനി സ്വീകരിക്കാത്തതെന്നും അദ്ദേഹം പറഞ്ഞു.
അതേസമയം, ശബരിമല വിവാദത്തില് ആരോപണ വിധേയനായ ഉണ്ണികൃഷ്ണന് പോറ്റി സ്വര്ണ്ണപ്പാളിയുമായി ചെന്നൈയില് ചടങ്ങ് സംഘിപ്പിച്ചതിന്റെ വിവരങ്ങള് പുറത്തുവന്നു. നടന് ജയറാമിനെയും ഗായകന് വീരമണി രാജുവിനെയും ചടങ്ങിലേക്ക് ക്ഷണിച്ചിരുന്നു. ജയറാമിനെയും വീരമണി രാജുവിനെയും കൊണ്ട് പൂജ നടത്തുകയും ചെയ്തു. ഇതിന്റെ ദൃശ്യങ്ങളും പുറത്തുവന്നിട്ടുണ്ട്.
