Malayalam 
പങ്കെടുക്കുന്നത് പാര്‍ട്ടി പരിപാടികളിലല്ല, പ്രചാരണം എംഎല്‍എ ആക്കാന്‍ അധ്വാനിച്ചവര്‍ക്കായി: രാഹുല്‍ മാങ്കൂട്ടത്തില്‍
പാലക്കാട്: മുതിര്‍ന്ന കോണ്ഗ്രസ് നേതാവ് കെ സുധാകരന്റെ പിന്തുണയില്‍ പ്രതികരിച്ച് രാഹുല്‍ മാങ്കൂട്ടത്തില്‍ എംഎല്‍എ. സുധാകരനും കെ സി വേണുഗോപാലും രമേശ് ചെന്നിത്തലയും വി ഡി സതീനും സണ്ണി ജോസഫും എല്ലാം എന്റെ നേതാക്കളാണ്. നേതാക്കളുടെ അഭിപ്രായങ്ങളില്‍ യോജിക്കുന്നുണ്ട്. അവര്‍ പറയുന്ന കാര്യങ്ങള്‍ അനുസരിക്കാനും ഞാന്‍ ബാധ്യസ്ഥനാണെന്നും രാഹുല്‍ മാധ്യമങ്ങളോട് പറഞ്ഞു.
രാഹുല്‍ കോണ്ഗ്രസ് വേദിയില്‍ ഉണ്ടാകില്ല, അദ്ദേഹം പാര്‍ട്ടിക്ക് പുറത്താണ്: കെ.മുരളീധരന്
സസ്പെന്ഷനിലായ ആള്‍ പാര്‍ട്ടി പരിപാടികളില്‍ പങ്കെടുക്കരുതെന്നാണ് നേതാക്കള്‍ പറഞ്ഞത്. ഞാന്‍ പങ്കെടുക്കുന്നത് പാര്‍ട്ടി പരിപാടികളിലല്ല. എനിക്കുവേണ്ടി അധ്വാനിച്ചവര്‍ക്ക് വേണ്ടിയാണ് പ്രചാരണം നടത്തുന്നത്. സ്ഥലം എംഎല്‍എ എന്ന നിലയില്‍ അവര്‍ അത് ആവശ്യപ്പെടുമ്പോള്‍ നിറവേറ്റേണ്ട ബാധ്യത എനിക്കുണ്ട് എന്നും രാഹുല്‍ പറഞ്ഞു.
ഏതെങ്കിലും പദവി കിട്ടിയിട്ട് വീട് കയറിത്തുടങ്ങിയ ആളല്ല ഞാന്‍. എനിക്ക് വോട്ടില്ലാത്ത കാലത്തും വീട് കയറിത്തുടങ്ങി പ്രചാരണം നടത്തിയ ആളാണ്. എനിക്ക് രണ്ട് കാലും കുത്തി നടക്കാന്‍ കഴിയുന്നിടത്തോളം കാലം, ഏത് പദവി ഉണ്ടെങ്കിലും ഇല്ലെങ്കിലും വീട് കയറി വോട്ട് ചോദിക്കുമെന്നും രാഹുല്‍ കൂട്ടിച്ചേര്‍ത്തു.
