Malayalam 
കുടുംബങ്ങളില്‍ ഏട്ടനനിയന്മാര്‍ തമ്മില്‍ പ്രശ്നങ്ങളില്ലേ? സന്ദീപുമായുള്ള പ്രശ്‌നം പരിഹരിക്കാവുന്നതേയുള്ളൂ : സി കൃഷ്ണകുമാര്‍
പാലക്കാട്: പാലക്കാട്ടെ ബിജെപിയില്‍ വിഭാഗീയത ശക്തമായിരിക്കെ പാര്‍ട്ടിക്കെതിരെ കഴിഞ്ഞ ദിവസം സന്ദീപ് വാര്യര്‍ ഉന്നയിച്ച ആരോപണങ്ങളില്‍ പ്രതികരിച്ച് പാലക്കാട്ടെ ബിജെപി സ്ഥാനാര്‍ത്ഥി സി.കൃഷ്ണകുമാര്‍. സന്ദീപ് വാര്യരുമായി എന്തെങ്കിലും പ്രശ്നങ്ങളുണ്ടെങ്കില് അത് തങ്ങള്‍ ഒരു മിനിറ്റ് ഒരുമിച്ച് കണ്ടാല്‍ പരിഹരിക്കാവുന്നതേയുള്ളൂവെന്നാണ് കൃഷ്ണകുമാര്‍ പറഞ്ഞത്.
കുടുംബങ്ങളില്‍ ഏട്ടനനിയന്മാര്‍ തമ്മില്‍ പ്രശ്നങ്ങളില്ലേ? സന്ദീപ് എനിക്കൊപ്പം തെരഞ്ഞെടുപ്പ് പ്രചാരണത്തിനുണ്ടായിരുന്ന ആളാണ്. പ്രശ്നങ്ങളുണ്ടെങ്കില് അത് പരിഹരിക്കാവുന്നതേയുള്ളു. കഴിഞ്ഞ ദിവസങ്ങളില്‍ സന്ദീപുമായി ഫോണില്‍ സംസാരിച്ചിരുന്നുവെന്നും ഇന്നലെയാണ് ബന്ധപ്പെടാന്‍ സാധിക്കാതിരുന്നതെന്നും അദ്ദേഹം വാര്‍ത്താ ചാനലില്‍ പറഞ്ഞു. കൂടാതെ വിവാദങ്ങളില്‍നിന്ന് എപ്പോഴും മാറിനില്‍ക്കുന്ന ആളാണ് താന്‍. എപ്പോഴും ചര്‍ച്ച ചെയ്യുന്നത് ജനങ്ങളുടെ വിഷയങ്ങളാണെന്നും അവരുടെ പ്രശ്നങ്ങളില്‍ ഇടപെട്ടാണ് തന്റെ പൊതുപ്രവര്‍ത്തനമെന്നും കൃഷ്ണകുമാര്‍ പറഞ്ഞു.
അതേസമയം ബിജെപി നേതൃത്വത്തിനെതിരെ, പ്രത്യേകിച്ച് സി. കൃഷ്ണകുമാറിനെതിരെ കഴിഞ്ഞദിവസം സന്ദീപ് വാര്യര്‍ പോസ്റ്റ്ചെയ്ത ഫെയ്‌സ്ബുക്ക് കുറിപ്പ് വലിയ ചര്‍ച്ചയായിരുന്നു. കുറിപ്പില്‍ കൃഷ്ണകുമാറിനെ രൂക്ഷമായാണ് സന്ദീപ് വിമര്‍ശിച്ചിരിക്കുന്നത്. തന്റെ അമ്മ മരിച്ചപ്പോള്‍ പോലും കാണാന്‍ വരാത്ത ആളാണ് കൃഷ്ണകുമാറെന്ന് സന്ദീപ് പോസ്റ്റില്‍ കുറിച്ചിരുന്നു. സന്ദീപിനെ അനുനയിപ്പിക്കാമെന്ന ബിജെപി നേതൃത്വത്തിനേറ്റ തിരിച്ചടിയായിരുന്നു സന്ദീപ് വാര്യരുടെ പോസ്റ്റ്.
Join with metropost : വാർത്തകൾ വേഗത്തിലറിയാൻ മെട്രോപോസ്റ്റ് വാട്സ്ആപ്പ് ഗ്രൂപ്പില്‍ അംഗമാകൂ..
