Malayalam 
ദര്ബാര് ഹാളില് പൊതുദര്ശനം: വിഎസിനെ ഒരു നോക്കുകാണാന് ജനപ്രവാഹം
തിരുവനന്തപുരം: മുന് മുഖ്യമന്ത്രിയും മുതിര്ന്ന കമ്യൂണിസ്റ്റ് നേതാവുമായ വി എസ് അച്യുതാനന്ദന്റെ വിയോഗത്തിന്റെ വേദനയിലാണ് കേരളം. ഇന്നലെ എകെജി സെന്ററിലെ പൊതുദര്ശനത്തില് ആയിരങ്ങളാണ് തങ്ങളുടെ പ്രിയ നേതാവിനെ അവസാനമായി ഒരു നോക്ക് കാണാനെത്തിയത്. ഇപ്പോള് പൊതുദര്ശനം ദര്ബാര് ഹാളില് പുരോഗമിക്കുമ്പോഴും വന്ജനപ്രവാഹമാണ് ഒഴുകിയെത്തുന്നത്.
കവടിയാറിലെ വീട്ടില് നിന്നാണ് ഭൗതിക ശരീരം ദര്ബാര് ഹാളിലെത്തിച്ചത്. ഉച്ചയ്ക്ക് ശേഷം ദേശീയപാതയിലൂടെ വിലാപയാത്രയായി ആലപ്പുഴയിലെ വേലിക്കകത്ത് വീട്ടിലേക്ക് കൊണ്ടുപോകും. വീട്ടില് പൊതുദര്ശനം. നാളെ രാവിലെ ആലപ്പുഴ ജില്ലാ കമ്മിറ്റി ഓഫീസില് പൊതുദര്ശനം. ശേഷം വൈകീട്ടോടെ വലിയ ചുടുകാട്ടില് സംസ്കാരം നടത്തും. സമരഭൂമിയില് വി എസ് അന്ത്യവിശ്രമം കൊള്ളും.
Join with metro post: വാര്ത്തകള് വേഗത്തിലറിയാന് മെട്രോപോസ്റ്റ് വാട്സ്ആപ്പ് ഗ്രൂപ്പില് അംഗമാകൂ…
വി എസിനോടുള്ള ആദര സൂചകമായി സംസ്ഥാനത്ത് മൂന്ന് ദിവസം ഔദ്യോഗിക ദുഃഖാചരണം പ്രഖ്യാപിച്ചിട്ടുണ്ട്. ഇന്ന് സംസ്ഥാനത്ത് പൊതു അവധിയാണ്. എല്ലാ സര്ക്കാര് ഓഫീസുകള്, വിദ്യാഭ്യാസ സ്ഥാപനങ്ങള്, പൊതുമേഖലാ സ്ഥാപനങ്ങള്, സ്വയംഭരണ സ്ഥാപനങ്ങള് എന്നിവക്ക് അവധി പ്രഖ്യാപിച്ചു. സര്ക്കാര് കെട്ടിടങ്ങളില് ദേശീയ പതാക പകുതി താഴ്ത്തിക്കെട്ടും.
