Malayalam 
എംഎം ലോറന്സിന്റെ മൃതദേഹം വൈദ്യപഠനത്തിന് നല്കാന് ഹൈക്കോടതി ഉത്തരവ്
കൊച്ചി: മരിച്ച മുതിര്ന്ന സിപിഎം നേതാവ് എംഎം ലോറന്സിന്റെ മൃതദേഹം വൈദ്യ പഠനത്തിന് തന്നെ നല്കാന് ഹൈക്കോടതി ഉത്തരവ്. ലോറന്സിന്റെ മൃതദേഹം വൈദ്യ പഠനത്തിന് നല്കരുതെന്ന് ചൂണ്ടികാണിച്ച് മക്കളായ ആശ ലോറന്സും സുജാത ലോറന്സും സമര്പ്പിച്ച അപ്പീല് തള്ളിക്കൊണ്ടാണ് ഡിവിഷന് ബെഞ്ച് ഉത്തരവിറക്കിയത്. മൃതദേഹം ഏറ്റെടുത്ത മെഡിക്കല് കോളേജ് നടപടി ശരിവെച്ചാണ് കോടതിയുടെ ഉത്തരവ്.
Also Read ; ശബരിമലക്കായി ടെലിവിഷന് ചാനല് ആരംഭിക്കാന് ആലോചന
മൃതദേഹം വൈദ്യപരിശോധനയ്ക്ക് നല്കുന്നതുമായി ബന്ധപ്പെട്ട് നേരത്തെ സിംഗിള് ബെഞ്ച് സമാനമായ വിധി പ്രസ്താവിച്ചിരുന്നു. ഇതിനെതിരെ നല്കിയ അപ്പീലാണ് ഡിവിഷന് ബെഞ്ച് തള്ളിയത്. മക്കള് തമ്മിലുള്ള പ്രശ്നമാണിതെന്നും അനന്തമായി വിഷയം നീട്ടിക്കൊണ്ടുപോകാനാകില്ലെന്നും ഹൈക്കോടതി നേരത്തെ വ്യക്തമാക്കിയിരുന്നു. അതേസമയം വിഷയത്തില് സുപ്രീം കോടതിയെ സമീപിക്കുമെന്ന് മകള് ആശ ലോറന്സ് പറഞ്ഞു.
എന്നാല് ലോറന്സ് ജീവിച്ചിരുന്ന സമയത്ത് മൃതദേഹം വൈദ്യപഠനത്തിന് നല്കണമെന്ന ആവശ്യം പ്രകടിപ്പിച്ചിരുന്നുവെന്ന് മകന് സജീവന് വ്യക്തമാക്കിയിരുന്നു. വിഷയത്തില് മധ്യസ്ഥനെ നിയോഗിച്ച് ഹൈക്കോടതി നടത്തിയ ചര്ച്ചകളും വിഷയത്തില് സമവായമുണ്ടാക്കാനാവാതെ പരാജയപ്പെടുകയായിരുന്നു. മൃതദേഹം നിലവില് എറണാകുളം മെഡിക്കല് കോളേജില് സൂക്ഷിച്ചിരിക്കുകയാണ്. സെപ്റ്റംബര് 21 നായിരുന്നു എം എം ലോറന്സിന്റെ അന്ത്യം. ന്യൂമോണിയ ബാധയെ തുടര്ന്ന് കൊച്ചിയിലെ സ്വകാര്യ ആശുപത്രിയില് ചികിത്സയിലിരിക്കെയാണ് മരണം സംഭവിച്ചത്.
Join with metropost : വാർത്തകൾ വേഗത്തിലറിയാൻ മെട്രോപോസ്റ്റ് വാട്സ്ആപ്പ് ഗ്രൂപ്പില് അംഗമാകൂ..
