Malayalam 
ഐഎസ്ആര്ഒ ചാരക്കേസ് കെട്ടിച്ചമച്ചതെന്ന് സിബിഐ
തിരുവനന്തപുരം: ഐഎസ്ആര്ഒ ചാരക്കേസ് കെട്ടിച്ചമച്ചതെന്ന് സിബിഐ കുറ്റപത്രം. ഹോട്ടലില് വെച്ച് സിഐ എസ് വിജയന് മറിയം റഷീദയെ കടന്നുപിടിച്ചപ്പോള് തടഞ്ഞ വിരോധത്തിലാണ് ചാരക്കേസെന്നും എസ് വിജയന്റെ സൃഷ്ടിയാണിതെന്നും കുറ്റപത്രത്തില് പറയുന്നു. മറിയം റഷീദയെ അറസ്റ്റ് ചെയ്ത് ദിവസങ്ങള് കഴിഞ്ഞാണ് ചാരക്കേസ് രജിസ്റ്റര് ചെയ്തത്. കോടതി വീണ്ടും കസ്റ്റഡിയില് നല്കാതിരുന്നതിനെ തുടര്ന്ന് കേസ് രജിസ്റ്റര് ചെയ്യുകയായിരുന്നുവെന്നും സിബിഐ കുറ്റപത്രത്തില് പറയുന്നു. ഐഎസ്ആര്ഒ ചാരക്കേസിലെ ഗൂഢാലോചന അന്വേഷിച്ച സിബിഐ സംഘമാണ് കുറ്റപത്രം സമര്പ്പിച്ചത്.
Join with metro post: വാർത്തകൾ വേഗത്തിലറിയാൻ മെട്രോപോസ്റ്റ് വാട്സ്ആപ്പ് ഗ്രൂപ്പില് അംഗമാകൂ..
മറിയം റഷീദയെ അന്യായമായി തടങ്കലില് വെക്കുകയും ഐബിയെ ചോദ്യം ചെയ്യാന് അനുവദിക്കുകയും ചെയ്തു. കുറ്റസമ്മതം നടത്താന് മറിയം റഷീദയെ കസ്റ്റഡിയില് വെച്ച് പീഡിപ്പിച്ചു. കേസിലെ രണ്ടാം പ്രതിയായ സിബി മാത്യൂസ് തെളിവുകളൊന്നുമില്ലാതെയാണ് നമ്പി നാരായണനെ അറസ്റ്റ് ചെയ്തതെന്നും കുറ്റപത്രത്തില് പറയുന്നു. ചാരവൃത്തി നടത്തിയെന്ന് എഴുതിചേര്ത്ത കേസില് തെളിവില്ല. പ്രതി ചേര്ത്തവരുടെ വീട്ടില് നിന്നും ഒന്നും കണ്ടെത്തിയില്ല. ബോസിന് വേണ്ടി വ്യാജ രേഖകള് ഉണ്ടാക്കിയത് അന്വേഷണ സംഘത്തിലുണ്ടായിരുന്ന സിഐ കെകെ ജോഷ്യയായിരുന്നു. മുന് എസ്പി എസ് വിജയന്, മുന് ഡിജിപി സിബി മാത്യൂസ്, മുന് ഡിജിപി ആര് ബി ശ്രീകുമാര്, എസ് കെ കെ ജോഷ്വാ, മുന് ഐ ബി ഉദ്യോഗസ്ഥന് ജയപ്രകാശ് എന്നിങ്ങനെ അഞ്ച് പേര്ക്കെതിരെയാണ് സിബിഐ കുറ്റപത്രം സമര്പ്പിച്ചിരിക്കുന്നത്.
