Malayalam 
മാസപ്പടി വിവാദം ; എട്ട് സിഎംആര്എല് ഉദ്യോഗസ്ഥര്ക്ക് സമന്സ് അയച്ച് എസ്എഫ്ഐഒ
തിരുവനന്തപുരം: മുഖ്യമന്ത്രിയുടെ മകള് വീണാ വിജയന് ഉള്പ്പെട്ട മാസപ്പടി വിവാദത്തില് സിഎംആര്എല് ഉദ്യോഗസ്ഥര്ക്ക് സമന്സ് അയച്ച് എസ്എഫ്ഐഒ. സിഎംആര്എല്ലിന്റെ എട്ട് ഉദ്യോഗസ്ഥര്ക്കാണ് സമന്സ് അയച്ചത്. ഈ മാസം 28 നും 29 നും ചെന്നൈയിലെ ഓഫീസില് ഹാജരാകാനാണ് നിര്ദേശം. അതേസമയം അറസ്റ്റ് ഒഴിവാക്കണമെന്ന് ആവശ്യപ്പെട്ട് സിഎംആര്എല് ഡല്ഹി ഹൈക്കോടതിയെ സമീപിച്ചിട്ടുണ്ട്.
Also Read ; സിദ്ധാര്ത്ഥന്റെ മരണം; കടുത്ത നടപടിയുമായി ഗവര്ണര്
സിഎംആര്എല്ലിന് വഴിവിട്ട സഹായം നല്കാന് മുഖ്യമന്ത്രി ഇടപെട്ടുവെന്ന് മാത്യു കുഴല്നാടന് ആരോപിച്ചിരുന്നു. പിന്നാലെ വിഷയം വിവാദത്തിന് വഴിവെച്ചു.എക്സാലോജിക് കമ്പനി വലിയ തുകയുടെ സാമ്പത്തിക ഇടപാടു നടത്തിയ മുഴുവന് സ്ഥാപനങ്ങള്ക്കും എസ്എഫ്ഐഒ നേരത്തെ നോട്ടീസ് നല്കിയിരുന്നു. കേസില് എസ്എഫ്ഐഒ അന്വേഷണം നടക്കുന്നതിനിടെ ഇഡിയും കേസ് രജിസ്റ്റര് ചെയ്തിട്ടുണ്ട്. എസ്എഫ്ഐഒ അന്വേഷണം നേരിടുന്നവരെല്ലാം ഇഡി കേസിന്റെയും അന്വേഷണ പരിധിയില് വരുമെന്നാണ് വിവരം.
Join with metropost : വാർത്തകൾ വേഗത്തിലറിയാൻ മെട്രോപോസ്റ്റ് വാട്സ്ആപ്പ് ഗ്രൂപ്പില് അംഗമാകൂ..
പണമിടപാട് അന്വേഷിക്കാന് ജനുവരി 31 നാണ് എസ്എഫ്ഐഒ അന്വേഷണ സംഘം രൂപീകരിച്ചത്. പണമിടപാടില് രജിസ്ട്രാര് ഓഫ് കമ്പനീസ് (ആര് ഒ സി) അന്വേഷണം പുരോഗമിക്കുന്നതിനിടെയായിരുന്നു എസ്എഫ്ഐഒയും അന്വേഷണം ആരംഭിച്ചത്. എക്സാലോജിക്-സി എം ആര് എല് ഇടപാടുകളില് ക്രമക്കേടുകള് നടന്നതായി ആര്ഒസി കണ്ടെത്തിയിരുന്നു. ഒരു സേവനവും നല്കാതെ എക്സാലോജിക്കിന് സിഎംആര്എല് വന് തുക കൈമാറിയെന്നായിരുന്നുവെന്നാണ് കണ്ടെത്തല്. തുടര്ന്നാണ് അന്വേഷണം എസ്എഫ്ഐഒക്ക് കൈമാറിയത്. 8 മാസത്തിനകം അന്വേഷണം പൂര്ത്തിയാക്കാനായിരുന്നു നിര്ദ്ദേശം.
