Malayalam 
ആശമാരുടെ നിരാഹാര സമരം മൂന്നാം ദിവസത്തിലേക്ക്; സമരം നടത്തുന്നവരുടെ ആരോഗ്യനിലയില് ആശങ്ക
തിരുവനന്തപുരം: ആശാപ്രവര്ത്തകരുടെ രാപ്പകല് സമരം നാല്പ്പത്തിയൊന്നാം ദിവസത്തിലേക്ക് കടക്കുമ്പോള് നിരാഹാരസമരം മൂന്നാം ദിവസവും തുടരുകയാണ്. ഓണറേറിയം വര്ധിപ്പിക്കണമെന്നതടക്കമുള്ള ആവശ്യങ്ങളുന്നയിച്ച് സെക്രട്ടേറിയറ്റിനുമുന്നില് നിരാഹാരം കിടക്കുന്നവരുടെ ആരോഗ്യസ്ഥിതിയില് ആശങ്കയുണ്ട്. കേരള ആശ ഹല്ത്ത് വര്ക്കേഴ്സ് അസോസിയേഷന് സംസ്ഥാന ജനറല് സെക്രട്ടറി എം എ ബിന്ദു, തങ്കമണി, ശോഭ എന്നിവരാണ് നിരാഹാരമിരിക്കുന്നത്. ആരോഗ്യ സ്ഥിതി മോശമായതിനെ തുടര്ന്ന് ആര് ഷീജയെ കഴിഞ്ഞ ദിവസം ആശുപത്രിയിലേക്ക് മാറ്റിയിരുന്നു.
Join with metro post: വാർത്തകൾ വേഗത്തിലറിയാൻ മെട്രോപോസ്റ്റ് വാട്സ്ആപ്പ് ഗ്രൂപ്പില് അംഗമാകൂ..
അതേസമയം, സമരത്തിന് പിന്നില് മഴവില് സഖ്യമാണെന്ന സിപിഎം സംസ്ഥാന സെക്രട്ടറി എം വി ഗോവിന്ദന്റെ പ്രസ്താവനയ്ക്കെതിരെ ആശാ പ്രവര്ത്തകര് ശക്തമായ പ്രതിഷേധത്തിലാണ്. ആശാ വര്ക്കര്മാരുടെ സമരത്തിന് പിന്നില് ഇടതുവിരുദ്ധ മഴവില് സഖ്യമാണെന്നായിരുന്നു എം വി ഗോവിന്ദന്റെ പ്രസ്താവന. ആശാ വര്ക്കര്മാരെ ഉപയോഗിച്ച് എസ്യുസിഐയും ജമാഅത്തെ ഇസ്ലാമിയും എസ്ഡിപിഐയും കോണ്ഗ്രസും ബിജെപിയും ലീഗും ഉള്പ്പെടെ ചേര്ന്ന് നടത്തുന്ന പ്രവര്ത്തനങ്ങളെ തുറന്നുകാണിക്കുമെന്നും എം വി ഗോവിന്ദന് പറഞ്ഞിരുന്നു.
