Malayalam 
ആഗോള അയ്യപ്പ സംഗമത്തില് എം കെ സ്റ്റാലിന് പങ്കെടുക്കില്ല; പകരം രണ്ട് മന്ത്രിമാരെ നിയോഗിച്ചു
തിരുവനന്തപുരം: ശബരിമലയിലെ ആഗോള അയ്യപ്പ സംഗമത്തില് തമിഴ്നാട് മുഖ്യമന്ത്രി എം കെ സ്റ്റാലിന് പങ്കെടുക്കില്ലെന്ന് അറിയിച്ചു. മുന്കൂട്ടി തീരുമാനിച്ച പരിപാടി ഉണ്ടായതിനാലാണ് പങ്കെടുക്കാന് പറ്റാത്തതെന്ന് തമിഴ്നാട് സര്ക്കാര് അറിയിച്ചു. സ്റ്റാലിന് പകരം രണ്ട് മന്ത്രിമാരെ നിയോഗിച്ചതായും സര്ക്കാര് വ്യക്തമാക്കി.
Also Read: രാഹുലിന് സംരക്ഷണം നല്കേണ്ടതില്ലെന്ന് യുഡിഎഫ്
അയ്യപ്പ സംഗമത്തിലേക്ക് എം.കെ.സ്റ്റാലിനെയും മകന് ഉദയനിധി സ്റ്റാലിനെയും ക്ഷണിച്ചതിനെതിരായ ബിജെപി രംഗത്തുവന്നിരുന്നു. തിരഞ്ഞെടുപ്പിന് ഏതാനും മാസങ്ങള് മാത്രം ബാക്കിനില്ക്കെ സിപിഎം സര്ക്കാര് ‘അയ്യപ്പ സംഗമം’ ആഘോഷിക്കുന്നത് ഒരു നാടകവും ‘ജനങ്ങളെ വിഡ്ഢികളാക്കാനുള്ള’ കുതന്ത്രത്തിന്റെ ഭാഗവുമാണെന്ന് ബിജെപി സംസ്ഥാന പ്രസിഡന്റ് രാജീവ് ചന്ദ്രശേഖര് പറഞ്ഞിരുന്നു.
ഹിന്ദുക്കളോടും ശബരിമല അയ്യപ്പഭക്തരോടും മാപ്പ് പറഞ്ഞിട്ട് മാത്രമേ പിണറായിക്കും സ്റ്റാലിനും അയ്യപ്പ സംഗമത്തില് പങ്കെടുക്കാന് കഴിയുകയുള്ളു. അയ്യപ്പഭക്തര്ക്കെതിരെ കേസെടുത്ത് ജയിലടച്ചതിന് പിണറായി വിജയന് സര്ക്കാര് മാപ്പ് പറയണമെന്നും രാജീവ് ചന്ദ്രശേഖര് കൂട്ടിച്ചേര്ത്തു.
