Malayalam 
സ്വകാര്യ ബസ് ജീവനക്കാര്ക്ക് പൊലീസ് ക്ലിയറന്സ് സര്ട്ടിഫിക്കറ്റ് നിര്ബന്ധം; ഹൈക്കോടതി
കൊച്ചി: സ്വകാര്യ ബസുകളിലെ ഡ്രൈവര്മാര്ക്കും ക്ലീനര്മാര്ക്കും പൊലീസ് ക്ലിയറന്സ് സര്ട്ടിഫിക്കറ്റ് നിര്ബന്ധമാക്കി. പൊലീസ് ക്ലിയറന്സ് സര്ട്ടിഫിക്കറ്റ് നിര്ബന്ധമാക്കിയ സംസ്ഥാന സര്ക്കാര് ഉത്തരവ് ചോദ്യം ചെയ്ത് ബസ് ഉടമകളും യൂണിയനുകളും നല്കിയ ഹര്ജി തള്ളിയാണ് ഹൈക്കോടതിയുടെ വിധി. പൊതുജന സുരക്ഷയെ കരുതിയാണ് നിബന്ധനകള് കൊണ്ടുവന്നതെന്നുമാണ് ജസ്റ്റിസ് സി പി മുഹമ്മദ് നിയാസ് അധ്യക്ഷനായ സിംഗിള് ബെഞ്ചിന്റെ നിരീക്ഷണം.
Also Read: സംസ്ഥാനത്ത് മഴ കനക്കും; തൃശൂരില് യെല്ലോ അലര്ട്ട്
3 വര്ഷത്തിനിടെ സ്വകാര്യ ബസ്സുകള് ഉള്പ്പെട്ട് 1017 അപകടങ്ങളാണ് കേരളത്തില് ഉണ്ടായത്. ജീവനക്കാര് ഗതാഗത നിയമങ്ങള് പാലിക്കുന്നുണ്ടെന്ന് ഉറപ്പാക്കേണ്ട ഉത്തരവാദിത്തം പെര്മിറ്റ് ഉടമകള്ക്കുണ്ട്. ജീവനക്കാര്ക്ക് ഏതെങ്കിലും വിധത്തിലുള്ള ക്രിമിനല് പശ്ചാത്തലമുണ്ടോ എന്നതും പ്രധാനമാണ്. കേവലം നിയമങ്ങളിലെ സാങ്കേതികത്വം മാത്രം ചൂണ്ടിക്കാട്ടി ഇത്തരം കാര്യങ്ങള് നടപ്പാക്കാതിരിക്കാനാവില്ലെന്ന് ഹൈക്കോടതി വ്യക്തമാക്കി. ജനുവരിയിലാണ് സര്ക്കാര് പുതിയ മാര്ഗനിര്ദേശങ്ങള് പുറത്തുവിട്ടത്. എതിര്പ്പുകളെ തുടര്ന്ന് പുതിയ നിബന്ധനകള് നടപ്പാക്കുന്നത് സര്ക്കാര് നിര്ത്തിവച്ചിരുന്നു. നിബന്ധനകള് നടപ്പാക്കാന് ആവശ്യമായ സമയം ലഭിച്ചുവെന്ന് നിരീക്ഷിച്ചാണ് ഹൈക്കോടതിയുടെ ഉത്തരവ്.
