Malayalam 
കുസാറ്റില്‍ ടെക് ഫെസ്റ്റിനിടെ തിക്കിലും തിരക്കിലും പെട്ട് നാല് വിദ്യാര്‍ത്ഥികള്‍ മരിച്ചു
കൊച്ചി: കുസാറ്റില്‍ ടെക് ഫെസ്റ്റിനിടെയുണ്ടായ തിക്കിലും തിരക്കിലും പെട്ട് നാല് വിദ്യാര്‍ത്ഥികള്‍ മരിച്ചു. ടെക് ഫെസ്റ്റിവെലായ ദീക്ഷ്ണയിലെ ഗാനമേളക്കിടെ വിദ്യാര്‍ത്ഥികള്‍ സ്റ്റേജിലേക്ക് ഒന്നിച്ച് കയറിയതാണ് ദുരന്തത്തിന് കാരണമായതെന്നാണ് വിവരം. കുസാറ്റില്‍ മെക്കാനിക്കല്‍ വിഭാഗം നടത്തിയ പരിപാടിക്കിടെയാണ് സംഭവം. 15ഓളം വിദ്യാര്‍ത്ഥികള്‍ തിക്കിലും തിരക്കിലും ബോധംകെട്ട് വീണു. അന്‍പതിലധികം വിദ്യാര്‍ത്ഥികള്‍ ആശുപത്രിയില്‍ പ്രവേശിപ്പിക്കപ്പെട്ടതായാണ് ഒടുവില്‍ ലഭിക്കുന്ന സൂചന.
മരിച്ചവര്‍ ആരെല്ലാമെന്നുള്ള വിവരങ്ങള്‍ പുറത്തുവന്നിട്ടില്ല. കോളേജിലെ ഓഡിറ്റോറിയത്തില്‍ നടന്ന പരിപാടിക്കിടെ മഴയുണ്ടായതോടെ കുട്ടികള്‍ സ്റ്റേജിലേക്ക് കയറിയത്. മഴ ശക്തമായതോടെ പുറത്തുനിന്നവരും ഓഡിറ്റോറിയത്തിലേക്ക് ഓടിക്കയറുകയായിരുന്നു. ഇതാണ് ദുരന്തത്തിനിടയാക്കിയതാണ് വിദ്യാര്‍ത്ഥികള്‍ നല്‍കുന്ന സൂചന. പരിക്കേറ്റവരെ കളമശേരി മെഡിക്കല്‍ കോളേജ് ആശുപത്രിയിലും സ്വകാര്യ ആശുപത്രികളിലേക്കും പ്രവേശിപ്പിച്ചു.
ഗായിക നികിത ഗാന്ധിയുടെ പരിപാടിയാണ് ഇവിടെ നടന്നിരുന്നത്. ഒരാളുടെ മുകളില്‍ മറ്റൊരാളായി കുട്ടികള്‍ വീഴുകയായിരുന്നു. ഇതില്‍ അടിയില്‍ പെട്ട 15ഓളം കുട്ടികള്‍ക്കാണ് ഗുരുതരമായ പരിക്കേറ്റത്. ആശുപത്രിയില്‍ എത്തിക്കും മുന്‍പ് തന്നെ മൂന്ന് പേര് മരിച്ചു. രണ്ട് ആണ്‍കുട്ടികളും രണ്ട് പെണ്‍കുട്ടികളും മരിച്ചതായാണ് സൂചന. പൊലീസ് സംഭവസ്ഥലത്തെത്തി വിദ്യാര്‍ത്ഥികളെയെല്ലാം ഒഴിപ്പിച്ചു. മന്ത്രിമാരായ പി.രാജീവ്, ആര്.ബിന്ദു, വീണാ ജോര്‍ജ് എന്നിവര്‍ സ്ഥലത്തെത്തുമെന്നാണ് വിവരം.
Also Read;സൗമ്യ വിശ്വനാഥന്‍ വധക്കേസ്; നാല് പ്രതികള്‍ക്ക് ജീവപര്യന്തം
ഡോക്ടര്‍മാര്‍ ഉള്‍പ്പെടെയുള്ള ആരോഗ്യ പ്രവര്‍ത്തകര്‍ കളമശേരി മെഡിക്കല്‍ കോളേജിലും എറണാകുളം ജനറല്‍ ആശുപത്രിയിലും എത്തിച്ചേര്‍ന്നതായി ആരോഗ്യമന്ത്രി വീണാ ജോര്‍ജ് അറിയിച്ചു. കൂടുതല്‍ ക്രമീകരണങ്ങളൊരുക്കാന്‍ ആരോഗ്യ വകുപ്പ് ഡയറക്ടര്‍ക്കും മെഡിക്കല്‍ വിദ്യാഭ്യാസ വകുപ്പ് ഡയറക്ടര്‍ക്കും നിര്‍ദേശം നല്‍കിയതായും മന്ത്രി പറഞ്ഞു. സ്വകാര്യ ആശുപത്രികള്‍ക്കും സജ്ജമാകാന്‍ നിര്‍ദേശം നല്‍കി. മതിയായ കനിവ് 108 ആംബുലന്‍സുകള്‍ സജ്ജമാക്കാനും നിര്‍ദേശമുണ്ട്.
