Malayalam 
സന്ദീപ് വാര്യരെ അപമാനിച്ചിട്ടില്ല, ആരെയും അവഗണിക്കുന്ന നിലപാട് പാര്‍ട്ടിക്കില്ല : ബിജെപി ജില്ലാ പ്രസിഡന്റ്
പാലക്കാട്: സന്ദീപ് വാര്യരുമായുള്ള പ്രശ്‌നത്തില്‍ പ്രതികരണവുമായി പാലക്കാട് ജില്ലാ പ്രസിഡന്റ് കെ എം ഹരിദാസ്. സന്ദീപ് വാര്യരെ അപമാനിച്ചിട്ടില്ലെന്നും സന്ദീപിന്റെ പരസ്യവിമര്‍ശനം ബിജെപിയുടെ തെരഞ്ഞെടുപ്പ് പ്രചാരണത്തെ ബാധിക്കില്ലെന്നും അദ്ദേഹം വ്യക്തമാക്കി.
സന്ദീപ് വാര്യര്‍ വിഷയത്തില്‍ തെരഞ്ഞെടുപ്പുമായി ബന്ധപ്പെട്ട് പ്രശ്നങ്ങളൊന്നും ഇല്ല. ഈ വിവാദങ്ങളൊന്നും പ്രചാരണത്തെ ബാധിക്കില്ല. തെരഞ്ഞെടുപ്പുമായി ബന്ധപ്പെട്ട എല്ലാ കാര്യങ്ങളും നല്ലരീതിയില്‍ തന്നെയാണ് പൊയ്ക്കൊണ്ടിരിക്കുന്നത്. ആരെയങ്കിലും അവഗണിക്കുകയോ അവഹേളിക്കുകയോ ചെയ്യുന്ന നിലപാട് പാര്‍ട്ടിക്കില്ലെന്നും ഹരിദാസ് പറഞ്ഞു.
അതേസമയം പാലക്കാട് തെരഞ്ഞെടുപ്പ് കണ്‍വെന്‍ഷനില്‍ തനിക്ക് അപമാനം നേരിട്ടെന്ന സന്ദീപ് വാര്യരുടെ ആരോപണം സംബന്ധിച്ച ചോദ്യത്തിന് ഹരിദാസ് മറുപടി നല്‍കാന്‍ തയ്യാറായില്ല. അതേപ്പറ്റി സംസ്ഥാന അധ്യക്ഷന്‍ പറഞ്ഞതിനപ്പുറം ഒന്നും പറയാനില്ലെന്നും അദ്ദേഹം പ്രതികരിച്ചു.
Join with metropost : വാർത്തകൾ വേഗത്തിലറിയാൻ മെട്രോപോസ്റ്റ് വാട്സ്ആപ്പ് ഗ്രൂപ്പില്‍ അംഗമാകൂ..
കഴിഞ്ഞ ദിവസം ബി.ജെ.പി. നേതൃത്വത്തോടുള്ള ശക്തമായ വിയോജിപ്പ് രേഖപ്പെടുത്തി സന്ദീപ് വാര്യര്‍ പരസ്യ പ്രതികരണം നടത്തിയതോടെയാണ് വിഷയം ഇത്രയ്ക്കും ചൂടുപിടിച്ചത്. പാര്‍ട്ടിയില്‍ നിന്ന് ഏറെക്കാലമായി തനിക്ക് കടുത്ത അവഗണന നേരിട്ടതായും പാലക്കാട് തെരഞ്ഞെടുപ്പ് കണ്‍വെന്‍ഷനില്‍ വേദയില്‍ ഇരിപ്പിടം നല്‍കാതെ ആക്ഷേപിച്ചതായും സന്ദീപ് വാര്യര്‍ ആരോപിച്ചിരുന്നു.
