മുളങ്കുന്നത്തുകാവ്: രാഗം തിയറ്റര്‍ ഉടമയെ വെട്ടിപ്പരിക്കേല്‍പ്പിച്ചത് ക്വട്ടേഷന്‍ സംഘമാണെന്ന് പൊലീസ്. തിയറ്റര്‍ ഉടമ സുനില്‍കുമാറിനെയും (55) ഡ്രൈവര്‍ വെളപ്പായ ചെല്ലാരി അജീഷിനെയും (25) ആണ് മൂന്നംഗ മുഖംമൂടി സംഘം വീടിന് മുന്നില്‍ വെച്ച് വടിവാള്‍ കൊണ്ട് വെട്ടിപ്പരിക്കേല്‍പ്പിച്ചത്. രാഗം തിയറ്ററിന്റെ ഉടമസ്ഥതയുമായി ബന്ധപ്പെട്ട തര്‍ക്കം തന്നെയാകാം ക്വട്ടേഷനു കാരണമെന്നാണ് പൊലീസ് സംശയിക്കുന്നത്. തിയറ്ററിന്റെ മുന്‍ ഉടമകളുമായി തര്‍ക്കവും കേസും നിലവിലുണ്ടായിരുന്നെങ്കിലും സമീപകാലത്ത് ഒത്തുതീര്‍പ്പിലെത്തിയിരുന്നു. പ്രതികളിലൊരാളെ കസ്റ്റഡിയിലെടുത്തിട്ടുണ്ടെങ്കിലും അറസ്റ്റ് സ്ഥിരീകരിച്ചിട്ടില്ല.വെട്ടേറ്റ് കയ്യിലെ അസ്ഥി പൊട്ടിയ അജീഷിനെ അടിയന്തര ശസ്ത്രക്രിയയ്ക്കു വിധേയനാക്കി. സുനിലിന്റെ ഇടതുകാലില്‍ വെട്ടേറ്റ ഭാഗത്തു മുപ്പതോളം തുന്നലുണ്ട്.

Join with metro post: വാര്‍ത്തകള്‍ വേഗത്തിലറിയാന്‍ മെട്രോപോസ്റ്റ് വാട്‌സ്ആപ്പ് ഗ്രൂപ്പില്‍ അംഗമാകൂ…

എറണാകുളത്തു നിന്നു വെളപ്പായയിലെ വീട്ടിലേക്കു മടങ്ങിയെത്തുന്ന സമയത്തായിരുന്നു ആക്രമണം. വീടിന്റെ ഗേറ്റ് തുറന്നു കാര്‍ അകത്തേക്കു കയറ്റാന്‍ ഡ്രൈവര്‍ അജീഷ് ഡോര്‍ തുറന്നു പുറത്തേക്കിറങ്ങിയപ്പോള്‍ ഇരുളില്‍ നിന്നു 3 പേര്‍ വടിവാളുമായി ഓടിയെത്തി വെട്ടുകയായിരുന്നു. സുനില്‍ ഡോര്‍ തുറക്കാന്‍ വിസമ്മതിച്ചപ്പോള്‍ ഗുണ്ടാസംഘം ചുറ്റികയില്‍ തുണിചുറ്റി കാറിന്റെ വശത്തെ ചില്ലടിച്ചു തകര്‍ത്തു. വടിവാളും കത്തിയും ഉപയോഗിച്ച് അവര്‍ വണ്ടിക്കുള്ളിലിരുന്ന സുനിലിനെ വെട്ടുകയും കുത്തുകയും ചെയ്തു. തടയാന്‍ ശ്രമിച്ചപ്പോള്‍ കൈവിരലുകള്‍ ആഴത്തില്‍ മുറിഞ്ഞു. ഇടംകാലിന്റെ പേശിയില്‍ ആഴത്തില്‍ വെട്ടേറ്റു. തന്നെ വാഹനത്തിന്റെ ഉള്ളിലിട്ടു തീയിടാനായിരുന്നു അക്രമികളുടെ ശ്രമമെന്നു സംശയിക്കുന്നതായി സുനില്‍ പറഞ്ഞു.