Malayalam 
നിയമസഭാ തെരഞ്ഞെടുപ്പ്; കാഞ്ഞിരപ്പള്ളിയില് കേന്ദ്രമന്ത്രി ജോര്ജ് കുര്യനെ കളത്തിലിറക്കാന് ബി ജെ പി
തിരുവനന്തപുരം: നിയമസഭാ തെരഞ്ഞെടുപ്പിന് അങ്കം കുറിക്കാന് തയ്യാറെടുത്ത് ബിജെപി. തെരഞ്ഞെടുപ്പില് കേന്ദ്രമന്ത്രി ജോര്ജ് കുര്യനെ കോട്ടയം ജില്ലയിലെ ബിജെപിയുടെ എ ക്ലാസ് മണ്ഡലമായ കാഞ്ഞിരപ്പളളിയില് മത്സരത്തിനിറക്കി വിജയം ഉറപ്പുവരുത്താനുള്ള നീക്കം ആരംഭിച്ച് ബിജെപി. ബിജെപി സെന്ട്രല് സോണ് പ്രസിഡന്റ് എന് ഹരി, ന്യൂനപക്ഷ മോര്ച്ച ദേശീയ വൈസ് പ്രസിഡന്റ് നോബിള് മാത്യു എന്നിവരും പരിഗണനയിലുണ്ട്. കഴിഞ്ഞ രണ്ട് തെരഞ്ഞെടുപ്പിലും ബിജെപിക്ക് മുന്തൂക്കമുള്ള മണ്ഡലമാണ് കാഞ്ഞിരപ്പളളി.
വിജയസാധ്യതയുളള മണ്ഡലങ്ങളിലെ സ്ഥാനാര്ത്ഥികളെ സംബന്ധിച്ച് ഇന്ന് സംസ്ഥാന നേതൃത്വം തീരുമാനമെടുക്കുമെന്നാണ് വിവരം. പതിനഞ്ചോളം മണ്ഡലങ്ങളിലെ സ്ഥാനാര്ത്ഥികളെ ഇന്ന് തീരുമാനിക്കും. തിരുവനന്തപുരം സെന്ട്രലില് കൃഷ്ണകുമാറിനും കരമന ജയനുമാണ് സാധ്യത. നേമത്ത് രാജീവ് ചന്ദ്രശേഖറും കഴക്കൂട്ടത്ത് വി മുരളീധരനും വട്ടിയൂര്ക്കാവില് ആര് ശ്രീലേഖയും മത്സരിച്ചേക്കും. ശോഭാ സുരേന്ദ്രന് അരൂരിലോ കായംകുളത്തോ മത്സരിച്ചേക്കും. എം ടി രമേശ് തൃശൂരില് നിന്നോ കോഴിക്കോട് നിന്നോ ആയിരിക്കും ജനവിധി തേടുക.
