Malayalam 
കനത്ത ആക്രമണം തുടര്ന്ന് ഇസ്രയേല്; ഇറാന്റെ ഔദ്യോഗിക മാധ്യമത്തിന് നേരെയും ആക്രമണം
ടെല്ആവീവ്/ തെഹ്റാന്: ഇറാന് തലസ്ഥാനത്ത് ഇസ്രയേല് വീണ്ടും കനത്ത ആക്രമണം നടത്തിയതായി റിപ്പോര്ട്ട്. ഇറാന്റെ ഔദ്യോഗിക മാധ്യമമായ ഐആര്ഐബി ചാനല് ആസ്ഥാനത്തിന് നേരെയും ഇസ്രയേലിന്റെ ആക്രമണം. മാധ്യമ പ്രവര്ത്തകര്ക്ക് ഉള്പ്പെടെ ജീവന് നഷ്ടപ്പെട്ടതായാണ് റിപ്പോര്ട്ട്. ഇതിനിടെ ഇറാന്റെ ഔദ്യോഗിക മാധ്യമത്തിന് നേരെ ആക്രമണം നടത്തിയതായി ഇസ്രയേല് പ്രതിരോധ മന്ത്രി ഇസ്രയേല് കാറ്റ്സ് സ്ഥിരീകരിച്ചിട്ടുണ്ട്. തെഹ്റാനിലെ സൈനിക കേന്ദ്രങ്ങളിലും ആക്രമണം നടക്കുന്നതായും റിപ്പോര്ട്ടുണ്ട്.
ഇതിനിടെ ഇറാനിലെ സൈനിക കേന്ദ്രങ്ങള് ലക്ഷ്യമിട്ട് ആക്രമണം നടക്കുന്നതായി ഇസ്രയേലി ഡിഫന്സ് ഫോഴ്സ് അറിയിച്ചിട്ടുണ്ട്. ഇറാന് തലസ്ഥാനത്ത് നിന്ന് ജനങ്ങളോട് എത്രയും വേഗം ഒഴിഞ്ഞു പോകാന് ബെഞ്ചമിന് നെതന്യാഹു ആവശ്യപ്പെട്ടതിന് പിന്നാലെയാണ് തെഹ്റാനില് ഇസ്രയേല് ആക്രമണം നടത്തിയതായി റിപ്പോര്ട്ടുകള് വരുന്നത്. ഇതിനിടെ തെഹ്റാനിലെ വിദേശ എംബസികളെല്ലാം അടച്ചതായാണ് അന്താരാഷ്ട്ര മാധ്യമങ്ങള് റിപ്പോര്ട്ട് ചെയ്യുന്നത്. ഇറാനിലെ ഇന്ത്യന് വിദ്യാര്ത്ഥികളെ അര്മേനിയന് അതിര്ത്ത് വഴി ഒഴിപ്പിക്കാനുള്ള നീക്കങ്ങള് ആരംഭിച്ചതായും റിപ്പോര്ട്ടുണ്ട്.
Join with metro post: വാര്ത്തകള് വേഗത്തിലറിയാന് മെട്രോപോസ്റ്റ് വാട്സ്ആപ്പ് ഗ്രൂപ്പില് അംഗമാകൂ…
ഐആര്ഐബിയുടെ ആസ്ഥാനം നില്ക്കുന്ന ഇടത്ത് നിന്നും ആളുകളോട് ഒഴിഞ്ഞുപോകണമെന്ന് നേരത്തെ ഇസ്രയേല് പ്രതിരോധ സേന മുന്നറിയിപ്പ് നല്കിയിരുന്നു. ഇറാന്റെ പ്രചാരണത്തിന്റെയും പ്രകോപനത്തിന്റെയും മുഖപത്രം അപ്രത്യക്ഷമാകാന് പോകുന്നു എന്നായിരുന്നു ഇസ്രയേല് പ്രതിരോധ മന്ത്രി ഇസ്രായേല് കാറ്റ്സിന്റെ പ്രതികരണം.
