തിരുവനന്തപുരം: തീവ്ര വോട്ടര്‍പട്ടിക പരിഷ്‌കരണത്തിന്റെ (സ്ഐആര്‍) സമയപരിധി നീട്ടി തിരഞ്ഞെടുപ്പ് കമ്മിഷന്‍. എന്യുമറേഷന്‍ ഫോമുകള്‍ തിരികെ നല്‍കാന്‍ ഡിസംബര്‍ 11 വരെ സമയം അനുവദിച്ചു. കേരളം, തമിഴ്നാട് ഉള്‍പ്പെടെ 12 സംസ്ഥാനങ്ങളിലെ സമയപരിധിയാണ് നീട്ടിയത്. അന്തിമ വോട്ടര്‍പട്ടിക 2026 ഫെബ്രുവരി 14നും കരടു വോട്ടര്‍പട്ടിക ഡിസംബര്‍ 16-നുമാണ് പുറത്തുവിടുക.

ആധാറിനുള്ള രേഖകളില്‍ പാന്‍ കാര്‍ഡ്, സ്‌കൂള്‍ സര്‍ട്ടിഫിക്കറ്റ് ഉള്‍പ്പെടെ ഒഴിവാക്കി, പുതുക്കല്‍ നടപടികള്‍ക്ക് ഭേദഗതികള്‍

പൂരിപ്പിച്ച എന്യൂമറേഷന്‍ ഫോം തിരിച്ചുകിട്ടിയത് 85 ശതമാനത്തോളം മാത്രമായിരുന്നു. 15 ശതമാനം കിട്ടിയില്ല. അഞ്ചുദിവസത്തിനകം ബാക്കി ഫോം തിരിച്ചുവാങ്ങുന്നതും ഡിജിറ്റൈസ് ചെയ്യുന്നതും അപ്രായോഗികമാണെന്ന് മുഖ്യതിരഞ്ഞെടുപ്പ് ഓഫീസര്‍ വിളിച്ച യോഗത്തില്‍ രാഷ്ട്രീയപ്പാര്‍ട്ടികള്‍ പറഞ്ഞിരുന്നു. അര്‍ഹരായ പലരും വോട്ടര്‍പട്ടികയില്‍നിന്ന് പുറത്താകുമെന്ന ആശങ്കപ്രകടിപ്പിച്ച അവര്‍ സമയം നീട്ടണമെന്ന ആവശ്യം ആവര്‍ത്തിച്ചിരുന്നു. 99.5% ഫോമും വിതരണം ചെയ്‌തെന്നും ബാക്കിയുള്ളവയുടെ വിതരണം ഉടന്‍ പൂര്‍ത്തിയാകുമെന്നും മുഖ്യതിരഞ്ഞെടുപ്പ് ഓഫീസര്‍(സിഇഒ) രത്തന്‍ യു. കേല്‍ക്കര്‍ മറുപടി നല്‍കി.