Malayalam 
പാലക്കാട്, ചേലക്കര ഉപതെരഞ്ഞെടുപ്പ്: രാഹുല് മാങ്കൂട്ടത്തിലും യു ആര് പ്രദീപും ഇന്ന് സത്യപ്രതിജ്ഞ ചെയ്യും
തിരുവനന്തപുരം: പാലക്കാട്, ചേലക്കര ഉപതെരഞ്ഞെടുപ്പില് വിജയിച്ച യുഡിഎഫ് സ്ഥാനാര്ത്ഥി രാഹുല് മാങ്കൂട്ടത്തിലും എല്ഡിഎഫ് സ്ഥാനാര്ത്ഥി യു ആര് പ്രദീപും ഇന്ന് സത്യപ്രതിജ്ഞ ചെയ്യും. രാവിലെ 11 മണിക്ക് ശങ്കരനാരായണന് തമ്പി ഹാളില്വെച്ചാണ് ചടങ്ങ് നടക്കുക. നിയുക്ത എംഎല്എമാര്ക്ക് സ്പീക്കര് എഎന് ഷംസീര് സത്യവാചകം ചൊല്ലിക്കൊടുക്കും. ചേലക്കര എംഎല്എ ആയിരുന്ന കെ രാധാകൃഷ്ണനും പാലക്കാട് എംഎല്എ ആയിരുന്ന ഷാഫി പറമ്പിലും ലോക്സഭാ തിരഞ്ഞെടുപ്പില് ജയിച്ചതിന് പിന്നാലെയാണ് ഈ രണ്ട് മണ്ഡലങ്ങളിലും ഉപതെരഞ്ഞെടുപ്പ് നടത്തിയത്.
ചേലക്കരയില് 64,259 വോട്ടുകളാണ് യു ആര് പ്രദീപിന് ലഭിച്ചത്. 12,201 വോട്ടുകളുടെ ഭൂരിപക്ഷത്തില് യുഡിഎഫ് സ്ഥാനാര്ത്ഥി രമ്യ ഹരിദാസിനെ തോല്പ്പിച്ചായിരുന്നു ജയം. പാലക്കാട് 18,724 വോട്ടുകള്ക്കാണ് രാഹുല് മാങ്കൂട്ടത്തില് വിജയിച്ചത്. ബിജെപിയുടെ സി. കൃഷ്ണകുമാറാണ് രണ്ടാം സ്ഥാനത്തെത്തിയത്. എല്ഡിഎഫ് സ്വതന്ത്രനായ പി. സരിന് മൂന്നാമതാണ്. ബിജെപിയുടെ ശക്തി കേന്ദ്രങ്ങളില് പോലും വ്യക്തമായ ആധിപത്യം നേടിയായിയിരുന്നു രാഹുലിന്റെ വിജയം. അതുകൊണ്ടുതന്നെ രാഹുലിന്റെ സത്യപ്രതിജ്ഞാ ചടങ്ങ് ആഘോഷമാക്കാനാണ് യൂത്ത് കോണ്ഗ്രസ് ഒരുങ്ങുന്നത്. രാഹുലിന് വന് സ്വീകരണമാണ് യൂത്ത് കോണ്ഗ്രസ് ഒരുക്കുക. രാഹുലിന്റെ സത്യപ്രതിജ്ഞാ ചടങ്ങില് ബിജെപിയില് നിന്നും കോണ്ഗ്രസിലേക്ക് ചേക്കേറിയ സന്ദീപ് വാര്യര് പങ്കെടുക്കും.
Join with metro post: വാർത്തകൾ വേഗത്തിലറിയാൻ മെട്രോപോസ്റ്റ് വാട്സ്ആപ്പ് ഗ്രൂപ്പില് അംഗമാകൂ..
