Malayalam 
സംസ്ഥാനത്ത് 11 ജില്ലകളില് യെല്ലോ അലര്ട്ട്; ഏഴിടത്ത് വേനല് മഴ, കടലാക്രമണ മുന്നറിയിപ്പ്
തിരുവനന്തപുരം: സംസ്ഥാനത്ത് ഇന്ന് 11 ജില്ലകളില് ഉയര്ന്ന താപനില മുന്നറിയിപ്പ്. ഏഴ് ജില്ലകളില് വേനല് മഴയ്ക്ക് സാധ്യതയുണ്ട്. കള്ളക്കടല് പ്രതിഭാസം തുടരുമെന്നും ഉയര്ന്ന തിരമാലയ്ക്കും കടലാക്രമണത്തിനും സാധ്യതയുണ്ടെന്നും കാലാവസ്ഥാ വകുപ്പ്.
Also Read ; ഇന്ത്യയിലെ തെരഞ്ഞെടുപ്പിൽ ചൈനയുടെ സൈബർ ആക്രമണം ഉണ്ടായേക്കാമെന്ന് മുന്നറിയിപ്പ്
കൊല്ലം, പാലക്കാട്, തൃശൂര്, ആലപ്പുഴ, പത്തനംതിട്ട, കോട്ടയം, കോഴിക്കോട് കണ്ണൂര്, എറണാകുളം, മലപ്പുറം, കാസര്ക്കോട് ജില്ലകളിലാണ് സാധാരണയേക്കാള് ഉയര്ന്ന ചൂടിന്റെ മുന്നറിയിപ്പ്. ഈ ജില്ലകളില് യെല്ലോ അലര്ട്ട് പ്രഖ്യാപിച്ചു. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി ജില്ലകളിലാണ് നേരിയ മഴ പ്രവചിക്കുന്നത്.
കൊല്ലം, പാലക്കാട് ജില്ലകളില് ഉയര്ന്ന താപനില 40 ഡിഗ്രി സെല്ഷ്യസ് വരെയും, തൃശൂര് ജില്ലയില് ഉയര്ന്ന താപനില 38 ഡിഗ്രി സെല്ഷ്യസ് വരെയും, ആലപ്പുഴ, പത്തനംതിട്ട, കോട്ടയം, കോഴിക്കോട് കണ്ണൂര് ജില്ലകളില് 37 ഡിഗ്രി സെല്ഷ്യസ് വരെയും, എറണാകുളം, മലപ്പുറം, കാസര്ക്കോട് ജില്ലകളില് ഉയര്ന്ന താപനില 36 ഡിഗ്രി സെല്ഷ്യസ് വരെയും (സാധാരണയെക്കാള് 2 – 4 ഡിഗ്രി സെല്ഷ്യസ് കൂടുതല്) ഉയരാന് സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിക്കുന്നു.
കടലാക്രമണ ജാഗ്രതാ നിര്ദ്ദേശം
കള്ളക്കടല് പ്രതിഭാസത്തിന്റെ ഭാഗമായി കേരള തീരത്ത് ഇന്ന് രാത്രി 11.30 വരെ 0.5 മുതല് 1.4 മീറ്റര് വരെ ഉയര്ന്ന തിരമാലയ്ക്കും കടലാക്രമണത്തിനും സാധ്യതയുണ്ടെന്നും ആയതിന്റെ വേഗത സെക്കന്ഡില് 20 സെന്റി മീറ്ററിനും 40 സെന്റി മീറ്ററിനും ഇടയില് മാറി വരുവാന് സാധ്യതയുണ്ട്.
കള്ളക്കടല് പ്രതിഭാസത്തിന്റെ ഭാഗമായി വടക്കന് തമിഴ്നാട് തീരത്ത് ഇന്ന് രാത്രി 11.30 വരെ 0.5 മുതല് 1.2 മീറ്റര് വരെ ഉയര്ന്ന തിരമാലയ്ക്കും കടലാക്രമണത്തിനും സാധ്യതയുണ്ടെന്നും ആയതിന്റെ വേഗത സെക്കന്ഡില് 20 സെന്റി മീറ്ററിനും 90 സെന്റി മീറ്ററിനും ഇടയില് മാറി വരുവാന് സാധ്യതയുണ്ടെന്നും ദേശീയ സമുദ്രസ്ഥിതി പഠന ഗവേഷണ കേന്ദ്രം അറിയിച്ചു. മത്സ്യത്തൊഴിലാളികളും തീരദേശവാസികളും ജാഗ്രത പാലിയ്ക്കുക.
Join with metro post : വാർത്തകളറിയാൻ Metro Post ന്യൂസ് ഗ്രൂപ്പിൽ Join ചെയ്യാം
