Malayalam 
വിസാ ഫീസുകള് കുത്തനെ കൂട്ടി യു.എസ്
ഇന്ത്യക്കാര്ക്കിടയില് വന് പ്രചാരമുള്ള കുടിയേറ്റ ഇതര വിസാഫീസുകള് കുത്തനെ കൂട്ടി യു.എസ്. പ്രസിഡന്റ് തിരഞ്ഞെടുപ്പിന് മുന്നോടിയായാണ് വിസാഫീസില് വര്ധനവ് വന്നിരിക്കുന്നത്. എച്ച്-1ബി, എല്-1, ഇ.ബി-5 എന്നീ വിഭാഗങ്ങളിലുള്ള വിസകളുടെ ഫീസാണ് വര്ധിപ്പിച്ചത്. പുതുക്കിയ ഫീസ് ഏപ്രില് ഒന്നുമുതല് പ്രാബല്യത്തില് വരും. പുതുതായി യു.എസ്. വിസയ്ക്ക് അപേക്ഷിക്കാനിരിക്കുന്ന ഇന്ത്യക്കാരെ ഈ നടപടി പ്രതിസന്ധിയിലാക്കുന്നതാണ്.
എച്ച്-1 ബി വിസയിലൂടെ ഓരോവര്ഷവും പതിനായിരക്കണക്കിന് ഇന്ത്യന് പ്രൊഫഷണലുകളാണ് യു.എസിലെത്തുന്നത്. ഫീസ് ഘടനയില് വരുത്തിയമാറ്റങ്ങള് അറ്റ ചെലവുകള്, ആനുകൂല്യങ്ങള്, ട്രാന്സ്ഫര് പേമെന്റുകള് എന്നിവയെ ബാധിക്കുമെന്ന് ഡിപ്പാര്ട്ട്മെന്റ് ഓഫ് ഹോംലാന്ഡ് സെക്യൂരിറ്റി ബുധനാഴ്ച പുറത്തുവിട്ട ഫെഡറല് വിജ്ഞാപനത്തില് പറയുന്നു.
