Malayalam 
ഏപ്രില് മാസത്തെ റേഷന് വിതരണം നാളെ മുതല്
തിരുവനന്തപുരം: സംസ്ഥാനത്ത് ഈ മാസത്തെ റേഷന് വിഹിതം നാളെ മുതല് ലഭിച്ചു തുടങ്ങും. പെസഹ വ്യാഴം, ദുഃഖ വെള്ളി അവധികള്ക്ക് ശേഷം ശനിയാഴ്ചയാണ് റേഷന് കടകള് തുറക്കുക. പശ്ചിമേഷ്യന് സംഘര്ഷത്തിന്റെ സാഹചര്യത്തില് ഏപ്രില് മാസത്തെ റേഷന് വിഹിതത്തിനൊപ്പം, മെയ് മാസത്തെ റേഷനും മുന്കൂറായി വാങ്ങാവുന്നതാണ്.
Join with metro post: വാര്ത്തകള് വേഗത്തിലറിയാന് മെട്രോപോസ്റ്റ് വാട്സ്ആപ്പ് ഗ്രൂപ്പില് അംഗമാകൂ…
ഏപ്രില് മാസത്തെ വിഹിതം ഏപ്രില് 04 മുതല് ഏപ്രില് 30 വരെയും, മെയ് മാസത്തെ വിഹിതം മുന്കൂറായി ഏപ്രില് 04 മുതല് മെയ് 30 വരെയും വാങ്ങാവുന്നതാണെന്നാണ് സിവില് സപ്ലൈസ് വകുപ്പ് അറിയിച്ചിട്ടുള്ളത്. കൂടാതെ മണ്ണെണ്ണയും, ലഭ്യതയ്ക്ക് അനുസരിച്ച് ആട്ടയും ഉപഭോക്താക്കള്ക്ക് ലഭിക്കും.
ഏപ്രില്-മെയ്-ജൂണ് ക്വാര്ട്ടറില്, വൈദ്യുതി ഉള്ള വീടുകളിലെ AAY കാര്ഡിന് ആകെ 1 ലിറ്റര് മണ്ണെണ്ണയും, PHH, NPS, NPNS കാര്ഡുകള്ക്ക് ആകെ 0.5 ലിറ്റര് മണ്ണെണ്ണയും, വൈദ്യുതി ഇല്ലാത്ത വീടുകളിലെ കാര്ഡുകള്ക്ക് ആകെ 6 ലിറ്റര് മണ്ണെണ്ണയും ലഭിക്കുന്നതാണ്. ഓരോ റേഷന് കാര്ഡിനും അനുവദിച്ചിട്ടുള്ള റേഷന് സാധനങ്ങളുടെ ഇനം തിരിച്ചുള്ള അളവ് അറിയുന്നതിനായി https://epos.kerala.gov.in/SRC_Trans_Int.jsp എന്ന ലിങ്ക് ഉപയോഗിക്കാവുന്നതാണ്.