ധാക്ക: ബംഗ്ലാദേശില്‍ ബലിപെരുന്നാളിനോടനുബന്ധിച്ച് അറുക്കാന്‍ നിശ്ചയിച്ചിരുന്ന, ഡൊണാള്‍ഡ് ട്രംപ് എന്ന് വിളിപ്പേരുള്ള ആല്‍ബിനോ എരുമയ്ക്ക് അവസാന നിമിഷം രക്ഷ. അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ മുടിയുടെ ശൈലിയോട് സാമ്യമുള്ള സ്വര്‍ണ്ണനിറത്തിലുള്ള തലമുടിയാണ് ഈ എരുമയ്ക്ക് ട്രംപ് എന്ന പേര് ലഭിക്കാന്‍ കാരണമായത്. സാമൂഹമാധ്യമങ്ങളില്‍ ഈ മൃഗത്തിന്റെ ചിത്രങ്ങളും വീഡിയോകളും തരംഗമായതോടെ അന്തര്‍ദേശീയ തലത്തില്‍ വലിയ രീതിയിലുള്ള ജനശ്രദ്ധയും കൗതുകവും ട്രംപിന് ലഭിക്കുകയുണ്ടായി. ഏകദേശം 700 കിലോഗ്രാം തൂക്കമുള്ള ഈ എരുമയെ ബലിപെരുന്നാള്‍ കര്‍മ്മങ്ങള്‍ക്കായി ഇതിനകം തന്നെ വിറ്റുപോയതായിരുന്നു. എന്നാല്‍ പെരുന്നാളിന് തൊട്ടുമുമ്പ് ജനങ്ങള്‍ക്കിടയിലുള്ള അമിതമായ താല്പര്യവും സുരക്ഷാ മുന്‍കരുതലുകളും കണക്കിലെടുത്ത് ബംഗ്ലാദേശ് ആഭ്യന്തര മന്ത്രാലയം ഇടപെടുകയായിരുന്നു.

Join with metro post: വാര്‍ത്തകള്‍ വേഗത്തിലറിയാന്‍ മെട്രോപോസ്റ്റ് വാട്‌സ്ആപ്പ് ഗ്രൂപ്പില്‍ അംഗമാകൂ…

ആഭ്യന്തര മന്ത്രി സലാഹുദ്ദീന്‍ അഹമ്മദിന്റെ നേരിട്ടുള്ള നിര്‍ദ്ദേശപ്രകാരം ഈ എരുമയെ ബലി നല്‍കുന്നതില്‍ നിന്ന് ഒഴിവാക്കുകയും, വാങ്ങിയ ആള്‍ക്ക് പണം തിരികെ നല്‍കാന്‍ ഉത്തരവിടുകയും ചെയ്തു. ഇതിനെ തുടര്‍ന്ന് മൃഗത്തെ തലസ്ഥാന നഗരമായ ധാക്കയിലെ ദേശീയ മൃഗശാലയിലേക്ക് മാറ്റി. മൃഗശാലയില്‍ ഇതിനായി പ്രത്യേകം സജ്ജീകരിച്ച കൂടൊരുക്കുകയും പരിചരണത്തിനായി ഒരാളെ ചുമതലപ്പെടുത്തുകയും ചെയ്തിട്ടുണ്ട്. പൊതുജനങ്ങള്‍ക്ക് കാണാനായി തുറന്നുകൊടുക്കുന്നതിന് മുന്‍പ് രണ്ടാഴ്ചത്തെ ക്വാറന്റൈനിലാണ് ഇപ്പോള്‍ ഈ മൃഗത്തെ പാര്‍പ്പിച്ചിരിക്കുന്നത്. ധാക്കയുടെ പ്രാന്തപ്രദേശമായ കെരാണിഗഞ്ചിലെ കര്‍ഷകനായ സിയാവുദ്ദീന്‍ മൃദയുടെ ഫാമിലായിരുന്നു ട്രംപ് എരുമ ഉണ്ടായിരുന്നത്.

തന്റെ അനിയനാണ് ഇതിന്റെ രൂപസാദൃശ്യം കണ്ട് ട്രംപ് എന്ന പേരിട്ടതെന്ന് ഫാം ഉടമ വ്യക്തമാക്കുന്നത്. കറുത്ത നിറത്തിലുള്ള കന്നുകാലികള്‍ കൂടുതലായുള്ള ബംഗ്ലാദേശില്‍ വെളുത്ത എരുമകള്‍ പൊതുവെ വളരെ അപൂര്‍വ്വമാണ്. മൃഗസംരക്ഷണ വകുപ്പ് ഉദ്യോഗസ്ഥരുടെ വിലയിരുത്തല്‍ പ്രകാരം, ഈ എരുമയ്ക്ക് ഇപ്പോഴും പ്രായം കുറവാണെന്നും വരും വര്‍ഷങ്ങളിലും ഇതിനെ നല്ല രീതിയില്‍ വളര്‍ത്താന്‍ സാധിക്കുമെന്നും കണ്ടെത്തിയതിനാലാണ് സംരക്ഷണത്തിനായി മൃഗശാലയിലേക്ക് മാറ്റാന്‍ തീരുമാനിച്ചത്.