Malayalam 
മകളെ ക്രൂരമായി മര്ദ്ദിച്ച പിതാവ് കസ്റ്റഡിയില്; ഇടപെട്ട് ബാലാവകാശ കമ്മീഷന്
കണ്ണൂര്: കണ്ണൂര് ചെറുപുഴ പ്രാപ്പൊയില് മകളെ അതിക്രൂരമായി മര്ദ്ദിച്ച പിതാവിനെ കസ്റ്റഡിയിലെടുത്തു. കാസര്കോട് ചിറ്റാരിക്കല് സ്വദേശി ജോസിനെയാണ് പോലീസ് കസ്റ്റഡിയിലെടുത്തത്. ജോസിനെതിരെ കേസെടുക്കാന് ജില്ലാ പോലീസ് മേധാവി അനൂജ് പലിവാള് ഐപിഎസ് ചെറുപുഴ പോലീസിന് നിര്ദേശം നല്കിയതിന് പിന്നാലെയാണ് നടപടി. പിതാവ് മകളെ അതിക്രൂരമായി മര്ദ്ധിക്കുന്ന ദൃശ്യങ്ങള് പുറത്തുവന്നതിന് പിന്നാലെയാണ് നടപടി.
Join with metro post: വാര്ത്തകള് വേഗത്തിലറിയാന് മെട്രോപോസ്റ്റ് വാട്സ്ആപ്പ് ഗ്രൂപ്പില് അംഗമാകൂ…
മകളെ പിതാവ് ക്രൂരമായി മര്ദിക്കുകയും അരിവാളിന് വെട്ടാനോങ്ങുകയും ചെയ്യുന്ന വീഡിയോ ശ്രദ്ധയില്പ്പെട്ടിട്ടും കേസെടുക്കാതിരുന്ന പോലീസ് നടപടിക്കെതിരെ വിമര്ശനം ഉയര്ന്നിരുന്നു. കുട്ടിയുടെ വീട്ടിലേക്ക് അടിയന്തിരമായി എത്താന് ചൈല്ഡ് ലൈന് പ്രവര്ത്തകരോട് ബാലാവകാശ കമ്മീഷന് നിര്ദേശം നല്കി. സംഭവത്തില് ബാലാവകാശകമ്മീഷന് ചെയര്പേഴ്സണ് കെ വി മനോജ് പോലീസില് നിന്നും റിപ്പോര്ട്ട് തേടിയിട്ടുണ്ട്. കണ്ണൂരിലെ ചെറുപുഴയില് വാടക വീടെടുത്ത് താമസിച്ചുവരികയാണ് ജോസ്.
അതേസമയം മാറിത്താമസിക്കുന്ന അമ്മയെ തിരികെ കൊണ്ടുവരാനുള്ള പ്രാങ്ക് വീഡിയോ ആണ് അതെന്നായിരുന്നു പിതാവിന്റെ വിശദീകരണം. ഇത് വിശ്വസിച്ചായിരുന്നു പോലീസ് കേസെടുക്കല് നടപടി വൈകിച്ചത്. എന്നാല് കുട്ടിയെ അച്ഛന് മര്ദ്ദിക്കുന്ന ദൃശ്യങ്ങള് പുറത്ത് വന്നിരുന്നു. അച്ഛനോട് തന്നെ തല്ലരുതെന്ന് കുഞ്ഞ് ആവര്ത്തിച്ച് ആവശ്യപ്പെടുന്നത് വീഡിയോയില് കേള്ക്കാം.
